掉左張梳化。 自從七月搬屋以來, 個廳變左亮欣playground, 就再無買梳化, cut埋有線, 高清電視都係睇完新聞就算。 坐小型膠椅, 無梳化咁舒服, 反而唔會黐住個位。無心機睇電視, 飯後多數落街散步, 腸胃健康。

事實上, 日間長時間對住電腦, 也令睇電視興趣大減。  睇下報章雜誌無咁傷眼。

但係, 話時話, 晚飯落街散步, 好多店舖都關門, 只剩下零食店, 逛兩逛又吃多了零食....所以都係瘦唔到身。一加一減又打和。 不過, 無論如何, 坐少o的梳化都係好事。

中秋過後, 仍然美食不斷, 呢個下半年收六張紅炸彈, 已經食了兩劑, 大約每月一劑, 有一餐去唔到。 今個月頭果餐先誇張, 由於係星期二賓客較忙,  8人坐一張枱, 我一人食兩份, 即係乳豬x2、蟹鉗x2、翅x2、鮑片x2....。去到燒雞, 成枱散剩我同一個舊行家傾湊仔經, 我成隻雞pack走, 連飯麵共四盒, 再加六個巨橙。爽!!! 啊o係度恭喜返陳生陳太新婚快樂。

有人問我如何瘦身? 我諗真係無乜方法, 只覺得食菜/水果係最重要。 近半年我很少做帶氧運動, 但由於週六日要抱下亮欣四處玩, 無意間手腳都多左運動, 唯一係工作坐得多有小肚腩。如果果排傷風感冒, 戒一戒口, 連肚腩都無埋。 所以, 在我呢個case而言, 控制飲食較為有效。

飲飲食食, 唔經唔覺呢個十月又去到尾聲, 迎接冬季來臨。十月十七日的音樂show終於完結, 都幾疲倦下。 好多人話, 「在台上我覓理想」, 但我又唔係真係太有喜好, 加上控制panel的大佬們真係太廢, 唔專業, 音響tune到一劈野, 真係無乜mood。 Anyway, 世事哪有完美? 自己盡力彈好就算(雖然都彈甩左o的) 。

聽日上畫o既MJ電影This is it(直譯:就係咁), 可能我會搵日去睇。 之前多得老友送張免費飛俾我去睇老翻mj在會展表演, ok啦....珠玉在前, 點樣都係比下去, 幸好樂隊和dancer都算精采。 上週六有空去深水埗大陸版dvd店check下有無新碟, 有個阿叔問店主, 有無mj最新果套It is good, 店主琅琅上口話, 未有呀, 美國上畫先, 最遲係hk.... 二人對答如流。 This is it,  it is good. 

上週blog頭黨寫樓價, 估唔到反應咁熱烈, 證明大家都好關心呢個topic。 至於本人會否「加推」相關文章, 要視乎市場走勢, 一旦有新睇法絕對唔會「惜售」。事實上, 某君同我完全相反觀點的文章, 個hit rate仲勁啦, 問題係搞到個討論變成有樓者話無泡沫, 無樓者話有泡沫.....甚至變成夾心階層vs中產的漫罵, 甚為無益。

最後, 下月出爐的, 除左有大閘蟹之外, 就係政改方案。 呢方面留待下回討論。bye

-------------
週日講題: (約翰福音11: 1-7; 17-44) 一個叫拉撒路的人死了, 被葬在山洞裏已四天。耶穌來看, 與眾人一同大喊, 有人問衪為何不能叫拉撒路復生? 衪回答: 「你若信就必看見神的榮耀。」然後衪叫大家移開大石, 並顯神績令拉撒路復活。 事件指出, 未看見神而先相信是很重要的, 而移開大石就是顯示我們信心的行動。