如果閣下父母有一幢樓留俾你, 或者你公司/學校有一幢宿舍俾你, 或者你家庭收入超過8萬元, 或者你曾中過六合彩頭獎, 可以唔需要看以下的文章。
上週三施政報告, 談及不少有關樓市及樓價上升的問題。但內容毫無新意, 仍然維持勾地制度和不加建居屋, 即是繼續高地價政策, 市民必須捱貴樓。
其實大家早已看到, 樓價飊升唔單止係香港的問題, 內地及亞太地區普遍都受害, 事關各國去年底大量印鈔pump水到金融體系, 水浸銀行貸款放鬆, 令樓價及地皮價格飛升。但這次施政報告其實沒有回應問題的核心。另外, 近日電台報章多番採訪家庭月入達7-8萬元的律師醫生夫婦, 指樓價高昂令他們買不起樓......標題實在震撼, 但這些報導同樣亦沒有擊中問題核心。
我認為, 除了個別例子(例如家中有特別醫療負擔等等), 家庭收入約為4-8萬元的人, 其實是有能力在地鐵沿線買樓, 問題在於間屋太細或太舊(必中其一)。
俾你住到港島太古城, 約每呎6-7千元, 專業人士在港島區返工算很近, 但其實樓已很舊、維修成本不菲。俾你住將軍澳、荔枝角及荃灣新屋苑, 話4千元一呎, 但由於「發水」問題, 話600呎其實得400呎可用(細間過公屋), 話800呎其實得600呎(細間過居屋)。 俾你住奧海城, 約每呎7千元, 交通方便, 但同樣受「發水」問題影響, 500萬元以為有700呎, 實質只係500呎, 即係成萬蚊一呎。
特區高官話: 市面好多樓係4千元一呎, 好多選擇; 首次置業者宜選地區遠一點/面積細一點; 新界樓仍然比深圳平宜; 豪宅天價未見令普偏樓市產生泡沫; 現時樓價仍較97年高峰低28%; 市民供樓租樓的支出不應超過三成。 如此總總, 無人可以話你講錯, 但如果係普選出黎的領導, 唔會咁講野law。
我個point係, 家庭月入4至8萬元的專業人士係買到樓, 但間屋隨時細過公屋/居屋!!!! 家庭月入2.3至4萬元的人士, 係夾心階層, 買樓唔係唔得, 但係好難!!!!
夾心階層係非常非常的辛苦!!!! 呢班係乜人? 就係千禧後畢業的大學生。物價騰貴, 在港一個家庭每月4萬元不是很見洗, mpf2千, 租屋1萬元, 還學生貸款4千, 供養父母6千至1萬, 衣食5千, 交通2千, 保險2千, 每月可以儲7千.... 如果200萬元樓儲首期一成, 看來儲2.38年就行, 但問題係, 這條數未計結緍、被裁、意外手術、宗教奉獻等等開支, 仲話想生仔? 何況, 你估大學生好容易搵到2萬蚊o既工作?
當然家庭月入2.3萬元以及貧窮戶又另有煩惱, 在此不能盡錄。
無疑, 香港人的人均收入在亞洲區內名列前矛, 物質豐富, 可以飲飲食食消費旅遊, 但唔代表大家的生活水平比內地或東南亞國家的人好。 因為生活水平係要計好多東西, 住屋空間、工時、工作壓力、前途、生活樂趣、社會流動性、社會資源分配(醫療、教育)等等。 計落做「港燦」其實唔係好筍架咋。
高官們如果能夠體察民間疾苦、感同身受, 縱然經濟不景或所謂「生不逢時」, 絕對不愁民望下滑。
談談題外話。 施政報告提到香港社會流動性下降, 畢業後等如注定一生, 令青年人看不到前景、感到徬徨及沮喪。因此政府建議搞創意產業, 並加快將工業區變成藝術基地。 我認為, 這確係一條出路, 但路途遙遠。事實上, band友和藝術家們早已遷入工廠降低成本, 問題係演出及展覽的成本實在太貴!!!! 搞文化產業糊口, 不如拍濕身寫真。
