呢排blog頭黨的內容好空虛, 好似無乜新話題, 我周一至五工作又很忙, 無甚時間update。趁有個空檔, 又等我o係度亂o翕下, wahaha。

呢排忙到爆, 在辦公室每天對住個mon的時間有7個鐘左右, 眼睛甚為疲倦。返家都無乜精神再上網, 反而多左練結他。 下個月17日有個show, 收得入場費, 都要認真練習下先, 費事出醜啦。我係配角黎o者, 大家唔洗咁大期望, 我亦都唔會fing頭。

由於工作關係, 最近睇很多有關內地地產的資訊。 地皮一塊一塊創出天價, 發展商囤積地皮, 懶理他日賣唔賣得出 。另外, 香港豪宅又係創出天價, 動不動就2-3萬元/呎, 香港人邊到買得起。前日有個經紀打我手機, 話知道我賣左樓套現, 有無興趣去何文田睇樓? 佢話:「好抵呀宜家, 只係萬零蚊一呎, 平過同區....」嘩, 咁睇得起小弟呀。我直言話「買唔起」.....但其實我想問佢, 有無單位係200呎左右, 剛剛放到一張床同廁所塔? 我應該買得起。

據經紀人士講, 不少有錢佬買左豪宅都唔係住, 收租都懶, 索性做吉屋, 得閒就黎坐下, 善價而沽。 但宜家都3萬蚊一呎, 貴過晒倫敦紐約, 仲可以升去邊? 某個「天x」頂樓複式單位叫價7萬蚊一呎喎, 好似話有人唬, 簡直係瘋狂世界...

幸好, 中低價樓又唔係真係升好多, 比年初都係升20-30%, 仲適合正常人類居住(當然仍係很貴)。始終就業率和出口都唔掂, 升極有限。但係自上月起內地樓價成交量和價格都有回軟跡象, 我諗香港樓市見頂不遠矣, 十一之後都真係唔知乜世界了。

閒時留意下樓盤, 又留意各區k1幼稚園。 周一冒著傾盆大雨去某愛國小學(幼兒部)交表, 有遮都唔掂, 我覺得我真係好偉大, 仲要交表前後都無落雨, 玩死。其他幼稚園都報下, 11、12月會面試, 情況暫時都好不妙。

時局混亂、俗務繁忙....唔理喇, 當務之急係買月餅過埋個中秋先。我想問下大家鍾意食邊款月餅。 有空請click入 http://www.setpoll.com/poll.php?mainId=8  投票, 唔該。

另外, 又諗緊去旅行。 諗緊....即係仲好遙遠。 美元疲弱令港元都疲弱, 兌外幣無jetso。觀望下先。