  |
    |
最於告別待業時光, 今天首天上班, 一切頗順利, 感謝主!!! 公司是CAI Business Intelligence, 是小小超投資的, 主要是做中國的財經新聞, 以英文報導, 收subsciption fee。在北角港運城上班, 感覺像回歸到十年前剛畢業到信報返工一樣~! 各位順路就找我食飯啦!!!
自四月中離開鳯凰衛視後, 一直享受美好假期, 當時一心是等待這份七月初上班的工作, 終於順利開工。期間有些波折, 也有到處見工, 包括一份在深圳的工作!!! 但你揀人時人揀你, 最後都談不攏, 始終傳媒的經營情況環境仍然困難。這兩個多月中, 有太多朋友出力幫忙我了, 十分感激!!! 我欠好多很人一餐飯!!! 總之, 現時搵工仍然艱難, 仍在待業的傳媒朋友請給我電郵, 看看我能否幫忙。
p.s 昨日我有少少感冒, 無去七一遊行啦。各位在烈日下暴晒的市民, 好勁呀!!! 香港要有雙普選!!
由於搬新居地方不夠位, 留下了幾件傢俬, 有意領取者請電郵至jwkpao@yahoo.com.hk 留姓名及電話, 先到先得, 唔識我都OK。認領至7月9日終止, 可於8月9日前約時間取, 其後將交由回收公司處理。
$0 餐枱(可擴展)連2椅子-枱玻璃有裂痕, 安全可用的, 椅子少用穩陣
$0 Giomani淺啡色梳化, 面皮和彈弓仍然完好
$0 兩盪門衣柜, 下格掛西裝/裙, 中格櫃筒, 上格可放冬天衫 
$0 書柜, 中間是玻璃櫃可放飾物模型, 上下格頗深
$0 美的風扇, 風較弱
$0 窗枱書枱約2.5米長, 左面打開是梳裝枱, 右面有書枱板及keyboard位, 中間兩格櫃筒
$0 老爺菲林相機, 別人給我的, 按制位壞了, 鏡頭完好
又黎我講下近況, 否則作為blog頭黨黨總書記, 成日唔蒲頭, 就會被人傳我身患惡疾、權力不穩或被軟禁, 再遲o的大家就會討論接班人。
呢期係我自我軟禁/隔離, 自從賣左間屋之後, 好多野忙。我搵到個租盤喇, 在隔一座樓, 很快會搬過去, 都係同屋苑, 所以維jeff灣畔呢個名我仍然繼續用。 為左由一房變兩房, 租貴過供,個廳、廁、廚和主人房都要縮細, 真係串金尺土。 座向、環境都係一般, 住落睇下舒唔舒服。
賣左樓, cash flow好勁呀哈哈, 展開瘋狂消費及瘋狂掉垃圾行動.....都會注重環保o既, 傢俱衣物會拎去回收公司。碌碌碌好爽呀.....唓, 都未爆卡, 所謂瘋狂, 其實只係對比我平時零消費而言o者。 好在上次通利開倉早收爐咋, 如果換著呢刻開倉, 我會o係果度紮營。
時間好唔夠洗。 上次同大家講我寫緊個網頁, 已經去到99%。 點知唉....有一句path搞唔到, 令我個send相片功能廢左, 宜家真係唐英年話斎「條條fing」。 我已忍痛斬晒o的send相功能, 個網失色不少, 但無偈喇, 我唔能夠再放時間落去, 就此了斷。很快會send給大家睇睇。
上週香港記者協會選新執委, 我有參選, 但無當選。唔緊要啦, 希望新一屆執委努力為維護香港新聞自由努力!!!! 工作順利!!!
剛剛父親節x2, 兩天忙透, 又吃到脹晒。 亮欣o係超級市場已經見過西瓜啦, 但去到爺爺家見到又好似很新奇。
又一城
美心的「潮爸」父親節蛋糕有對眼鏡。
好多人問起, 豬流感托兒所點呀? 係如常開門, 因為佢係社署轄下的, 唔係教育局, 所以唔洗「停課」。但由於要避免傳播病菌, 宜家托兒所正在用最高警戒措施, 微燒、小病都唔收, 大運動例如踏單車又暫停....都幾悶下。 唯望假日天氣好, 就出外逛逛做運動。
------
週日教會講題: 基督徒時常面對屬靈爭戰, 因為撒旦會用很多招數令人遠離神, 例如誤導你做一些不正確的事、踐踏你尊嚴, 甚至在你傷疤撒鹽。上帝叫你原諒別人, 撒旦就往往把你最不能原諒的人放在你面前, 令你無地自容。因此, 基督徒要常常讀聖經、聽見證, 裝備好去打仗。
1999年的6月9日, 我正式踏入報界當財經記者, 開始撈世界的生涯。轉眼十年, 多少波折喜悅, 都付諸一笑。
十年前我很天真很傻, 首天上班就被一個同事問:「咦? 你係邊個請你架!? 幾錢人工?」 吓, 唔係間公司請我o既咩, 仲要分邊個請? 我答佢是誰interview我。至於人工, 我提議交換講, 佢話好。佢得知我人工後驚訝:「吓咁低? 上年請果批都無咁平!」跟住佢話下次先講佢幾錢人工。我被玩了。
辦公室充滿詭詐, 分派系馬房。我唔係唔知道, 但我一直拒絕接受呢個現實, 總之有東西就學就做, 從來不泊「碼頭」, 終極下場係.....無運行。憑著一夥所謂赤子之心(即係自負), 好鍾意「忠言直諌」。有次大老闆召開大會話諗偈仔削資源, 佢建議由攝記帶埋錄音機去採訪, 錄音帶就交由辦公室的記者去聽, 然後寫稿, 可省掉不少人手及交通費。係人都知呢個方法白痴, 但無人敢出聲。 我直言: 「咁係唔work架。」同事們當我係英雄.....唔係卦, 實話實說咋喎。
又有一次大老闆話要cut雙糧, 我話:「你盤數唔公開, 叫人點信你?」兩年後呢間公司上市並公開財務表, 嘩, cut雙糧果年係賺得最多錢!!
忠臣通常係慘死, 經過十年我才認清呢個道理。多年來, 我不斷尋找願意接受難聽「忠言」的老細, 最終發現, 十個有八個都唔鍾意「忠言」, 令我頗為失望; 老細們大都喜歡服從性高的手下。或許換角度看, 多年來我仍搵到兩個老細願意聽我插佢地, 不枉矣。 我又發現, 人夾人緣實在是十分十分十分重要。唔夾的話, 打你入冷宮或狂做下欄工作; 夾的話, 幫你爭取加薪、幫你搵工、私人俾錢你睇醫生都可以。
撈海浮沉, 學歷經驗只佔三成, 其餘都是際遇的問題。 遇到好老細, 可能幸運過執到金。而且, 時局變異, 通常老細都是無得揀的(反過來, 老細又會覺得手下是無得揀的)。外國人辦公室政治較簡單, 阿頭被炒或辭職, 手下跟著走; 但中式辦公室政治就很流行「換頭不換身」, 新老細上場, 手下要瘋狂轉軚去迎合, 否則就會遭「陰乾」或打入「冷宮」。呢o的老細唔夠膽炒人, 只懂玩猴子把戲清除異己, 實在可笑。
老細們分派分系, 猶如小學生「我唔同你玩」般無聊。 根源通常係大老闆喜歡將公司分2、3派, 希望引發良性競爭以享漁人之利, 但往往事與願違, 內耗隨時可令公司癱瘓。 幸好我曾做過一間無大內耗的報館(雖然老闆很孤寒), 高層人員排次分明減少鬥爭, 中下層可做實事幹新聞。而這報館在近十多年的發展也很好。 相反, 某報館老闆喜歡換老總, 而新老總對前朝餘孽有介心, 又鬥一番。
撈
世界難撈, 隨著互聯網、免費報紙的出現, 加上人才過剩, 香港報界確是夕陽工業。不少香港記者做了十年後, 收入仍與剛畢業時差不遠, 終於要放棄, 跳槽到政府、大財團做公關或助理, 人工才可幾級跳。浮沉十年, 我也算「霉」的一批, 為了追尋理想減薪做政治記者五年, 又不懂要求加薪, 一字記之曰「窮」。後來經濟好轉, 重投財經記者行列, 收入才好一點, 但去年又被裁掉。曾問自己是否入錯行, 應轉行做公關、分析員、議員助理? 最後都打消了, 因為我熱愛傳媒這一行。
過去十年間, 有年半是讀書和待業, 即是做了八年半記者。 這八年半經驗其實在報界是很淺的, 但回顧一望, 真的感慨無限。慶幸身體仍然健康(雖然不能再捱通宵), 更要慶幸的, 是我在這個詭詐和黑暗的撈海中, 仍然維持到個所謂赤子之心(又稱自負)。我有錯我會認, 老細有錯我會插, 委曲求全、擦鞋吹水、講是講非o既野我唔會做。果o的日夜只顧玩弄權術的無知人收皮啦。
如果要給即將畢業又有志投身新聞界的青年人一些忠告, 都係老土果句--裝備自己! 職場終極係睇知識, 唔係鬥玩狡詐。平時要儲錢, 有餘力應去進修, 等待伯樂出現。另外, 雖然不斷在工作上鞭策你的才是好老細, 但記緊呢個世界係「能者多勞但不多得」, 盡可能2、3年就跳槽, 每次搏加薪20-30%兼整靚CV, 好過每年等加1-2%。 事實上, 90%老細都唔會幫你爭取加薪, 部份甚至會幫公司壓你價, 並在關鍵時刻攞你祭旗。而若想以傳媒作終身職業, 奉勸學習一點投資技倆, 唔好靠mpf做退休金。
由端午節到今天, 一直很多活動, 今天終於可以休息。 上週日是聖靈降臨節, 早上返教會, 有四人受洗, 可喜可賀!!! 願主保守他們, 在教會中有喜樂, 也榮神益人。同日有Rose幹事的榮休午宴, 又係值得高興!! 多年來任勞任怨, 把教會帳目和文書工作處理得井井有條, Rose實在是神的好僕人, 勁!!!! 祝佢榮休後天天開心!!
周日下午, 如前文所述, 去了六四遊行, 其實真係有o的體力透支, 但無所謂吧, 很樂意去做!!! 週一至四, 又忙家事、湊女、練歌、去燭光晚會等等, 時光飛逝, 又即將到週末。
最近亮欣生活多姿多采, 返托兒所有生日會、唱遊, 周六又參加左一個playgroup, 家中玩具係超級多 。 我只是負責接送、煲湯及部份家務, 已經忙透了, 遲些若有全職工作, 真的不用睡覺。
最近我同亮欣識左個新朋友叫Barney.....係一隻紫色的恐龍卡龍人物。 各大書局都有售賣佢o既vcd, 內容類似「放學icu」果個洋葱頭, 閒時唱歌、跳舞、聚餐。 其實開頭我覺得呢隻野很核突, 笑得又騎呢, 但後來睇睇下, 又覺得ok。有無人睇過?? 耶魯大學有研究批評, Barney永遠係笑騎騎, 只談風花雪月, 會令小朋友「拒絕接受負面事件」。.....目前很難判斷, 但如果真係咁都唔錯喎, 笑騎騎過一世.....
------------------
上週日教會講題: 有一間新成立的教會, 在短短兩年內人數激增至6千人, 牧師親自尋箇中原因。他訪問了多很位小組組長, 發現各組也有不同的成長因素, 而唯一的共通點是, 各組都有共同的異象same vision, 也分享「共感熱切」的心same passion。原來, 即使教會有很多熱心人和資源, 若欠缺一個共同異象(例如社區見證), 是難以增長的。
昨日一家去了六四20週年遊行, 用了2小時由維園行至金鐘太古廣場。天公造美, 沒有猛烈太陽也沒有下雨, 氣溫不太焗熱兼有微風, 最適合遊行。亮欣坐在媽媽綁腰的hip seat上, 吃手指餅; 我就揹行李、撥扇。大隊大致暢順, 較想象中多人。
3:20pm 略遲到達維園, 所以跟在隊尾
如常塞在SOGO
碧血丹心民不畏死
5:20pm太古廣場
到達後, 亮欣仍然精力充沛, 到商場看玩具, 但家長已經腳軟, 趕快回家休息。 六四民主運動需要薪火相傳, 期望下一代長大後仍會紀念六四死難者。
支聯會指人數達8,000人, 警方稱只有4,700人。 http://hk.news.yahoo.com/article/090531/4/cger.html
1989年6月4日, 我雖然只是一個小六學生, 但深夜裏從電視機看到坦克、流血, 以及電視機旁媽媽含淚的眼睛, 就明白到這場血腥鎮壓實在是千萬個錯誤, 傷透了多少中華人民的心。 某晚, 屋邨有幾百人集會, 用燭光聲援民運學生, 我也有去; 小學全體師生也有默哀....這一切都是現時30歲世代人經歷過的。而多年來大量報章、中外電視報道、反思辯論會、現場記者和學生組織人士的口述歷史都證實了一個答案: 六四是一場愛國民主運動。
不過, 近日多名20歲世代的年青人, 包括前港大學生會會長陳一諤及香港青年發展網絡召集人呂智偉意圖為六四「翻案」, 指學運領袖有問題、有外力介入民運, 實在令人咋舌。
其實這些言論早於90年代初已出現, 根本不成氣候, 因為當年連最親北京的文匯報都開了天窗打出「痛心疾首
97年前, 本港差不多所有大學學生會都支持平反六四, 立場接近學協的人都被稱為「親中」、「轉軚」。回歸後, 反「親中」越來越少人說了, 最多是說「愛國不愛黨」。尤其是香港經濟不景, 青年們都難於找工作, 大家爭相認識祖國, 以通方便之門。今天, 香港30歲世代人士所從事的工作大多與內地有關, 40歲世代更不少在內地經營生意, 若不夠「親中」, 小則失去發財機會, 大則失去回鄉證或在內地被屈逃稅、有情婦。所以, 30、40歲的你, 若今天仍會在facebook公開向朋輩談平反六四、出席六四燭光晚會、關注內地人權情況, 已是很「有心」了。
不過, 單是「有心」並不足以承傳這場民主運動, 要合力抵抗近年持續出現的「歪理」。
近年網上最常用的所謂「揭穿六四謊言」技倆包括:
1. 柴玲當年提倡血祭民運但最早「走佬」;吾爾開希等前學運領袖到美國享福, 私德欠佳;
2. 六四相片中, 被燒焦的屍體是解放軍而非市民; 大量民眾持有武器;
3. 有外國組織派錢給民運人士, 令運動變質, 目的是要推翻中共政權;
4. 過去20年中國經濟起飛, 辦奧運、上太空, 證實當年鄧小平忍辱負重決定鎮壓是對的;
5. 有人誇大六四死傷人數, 渲染事件為屠城, 謀取選票;
6. 天安門廣場是和平清場, 稱為血洗是不正確;
7. 內地已不斷改善政制、人權, 若要求平反六四, 只會拖慢改革進度;
8. 西方列強每年利用西藏及六四議題向中國施壓, 在外交和商貿上索取利益。
這些歪理, 其實都不是新鮮事, 廿年來已聽了不少, 毋須勞動華叔也可回應。
1. 學運領袖私德欠佳是不理想, 但無損整場學運的價值, 而相比開槍殺人的錯, 那只是萬分之一。
2. 何不進行獨立徹查及公開死傷者資料? 從新聞片看, 民眾的所謂武器最多只是擲石。 據上週日城市論壇主持謝志峰說, 當年他身在北京採訪, 見民運人士曾得到一車軍器, 隨即歸還解放軍。
3. 獲得港人和外國組織提供捐款和物資的民運人士, 並沒有從中取利。六四是為了爭取民主而不是要推翻中共。
4. 若無六四鎮壓, 中國的成就將更大。
5. 在官方進行獨立徹查前, 目擊者有權就死傷人數作評估。 至殺了多少人才算屠城? 是否有政客謀取私利? 公眾自有定論。
6. 根據資料, 血洗確曾出現, 只是在長安大街而並天安門廣場。
7. 內地貪污和人權問題比20年前嚴重。
8. 不能本末倒置。 血腥鎮壓就是錯。
雖然那些「歪理」連北京當局現時都棄用了, 但現時不少年青新生代及來港讀書的內地學生卻信以為真。這也難怪, 因為教科書沒談, 內地網被封殺, 社會環境又不利有關討論。因此, 把六四議題納入香港教科書是刻不容緩的!! 雖然有人說事件未有定性, 難以寫成歷史, 但至少也儘量陳述資料, 成為國民教育一部分。特區政府和教育部門應作配合。
最後談談, 不少人看經濟成果重於民主發展, 但其實兩者並不矛盾, 應同步發展。沒民主和新聞自由, 中國反貪反官僚的路十分難行。 目前, 北京仍以社會穩定為由, 拒絕平反六四, 但承諾會繼續政治改革。不過, 不平反六四又如何政改? 而且人命就是人命, 應盡快還天安門母親一個公道。
--------
資料
http://www.youtube.com/watch?v=r7ou2-Kv4UA 天安門紀錄片
http://www.youtube.com/watch?v=wUpcQSJ0tTE 溫家寶談六四
http://www.youtube.com/watch?v=qE6u0Rt9yw8 趙紫陽天安門講話
http://truth2009.mysinablog.com/index.php?op=ViewArticle&articleId=1648350 反支聯會網頁
多天沒有打blog, 日日新鮮事, 弄這弄那又一週。 上週日教會弟兄結婚, 謝蕭聯婚, 恭喜晒!! 祝白頭到老!!! 婚禮在葵興信義會天恩堂。 西餅很好吃呀!!!!。
離開鳯凰一個月了, 周一至五都埋首寫網頁, 研發工程不見天日。 最近一星期在技術上有多項突破, 相信加多少少東西就可推出; 回想每次有突破, 都真係過癮。 網頁的外觀唔係好靚, 但會很實用....如果長遠可以收返o的網上廣告費, 就好law。
每週都有去見工, 搵工的路一波多折, 漫長但是難得的經歷; 仲有好多朋友記得我, 不時彈o的好野過我in, 多謝晒。市道較幾個月前好轉, 但人工與我資歷相稱的工作其實不算太多。 本來有兩份差不多, 但傾傾下都係唔考慮lu, 不適合; 另外有些, 在價錢上談不攏, 又拖拖拉拉。 算數, 手頭上仲有後著, 估計好消息可能快來臨。
另外, 最近忙煲湯。 亮欣鍾意飲湯, 我咪煲law, 佢帶契成家人有湯飲。
夾band確係瘋狂, 乜都夾一餐, 又搞mixing, 尋覓真正的自由....即係頹廢。 仲要遇著三年一度的通利開倉, 我去左兩次!!! 雖然我好忍手, 但o的野下下減到4、5折, 難免進貢。 今次真係佢開貨倉、我開銀倉。 有一支condenser咪, 我「觀察」左8-9年, 一路都無買, 佢竟然五折, 殺殺殺!!! 終於落入我手, haha。 仲有兩天呀, 大家快o的去呀, 北角新都城百貨三樓!!!! 。
想去旅行, 但豬流感, 要迴避一下。
閒時又開放間屋俾人黎睇樓....無聊客居多, 價都唔還, 真係浪費左我不少時間。 但無偈, 唔賣樓又套唔到筆錢換樓, 唯有繼續應酬。 近日誠哥又叫大家小心通脹, 應考慮買樓, 睇黎真係堅堅地。 即使你長期杯葛百佳、屈銀紙, 都應考慮下佢o既意見; 佢三月底都叫過大家買股, 四至五月狂升啦。
至於電視方面, 閒時會睇下「柴九」, 但沒有追看。劇情新意不大, 都係典型爭產橋段。 最近網上又話「柴九」收視拍得住laughing哥, 我諗好快又有社會學家走出黎講:「經濟不景, 社會需要英雄....」。 其實計我話, 觀眾唔係要睇英雄, 而係想睇人「忍辱負重」捱幾十刀壯烈犧牲, 呢個現象係反映打工仔宜家「忍辱負重」得好慘, 需要睇到有人比自己更慘, 先至可以平衡心理。 如果我的推論無錯, 今次無線揼本開拍laughing哥前傳, 一定蝕死!!!! 因為呢部片根本捉錯路, 以為觀眾想睇古惑仔、卧底、英雄, 卻捉不著「柴九」與laughing哥的共通點--「為左份工俾人插」。
各界打工仔加油吧!! 減薪加辛難頂, 但好快會見青天。 千祈唔好信Manning正能量廣告, 歐陽震華竟然對住個OT到半夜的人講「好過無野撈」, 真係滅絕人性!!!!! 雖然香港人係有拼搏精神, 但係OT到半夜係咪真係「好過無野撈」!? 見仁見智。 在我而言, 我依家「無野撈」得好痛快, haha。呢o的爛鬼廣告真係益晒o的無良老闆。
六四就快到, 我會一家人去燭光晚會, 大家都去吧!!! 七一大遊行, 我都好可能上街, 爭取普選。 下月政府會用公帑派錢, 據報導, 綜緩會有雙糧、打工仔有退稅、業主有減差餉、中小企獲更多貸款支援, 但我估計遊行人數仍會很多。 仲有, 我已提出左十次喇, 點解次次減差餉, 都唔包地租!!!!? 即係新界人的減幅係少過九龍、港島人!!! 地租係一百年前殖民遺物, 修改基本法啦!。
http://www.youtube.com/watch?v=5_hIojjA3A4&feature=related 原曲
http://www.youtube.com/watch?v=fn3LLYpFWuw&feature=related live
http://www.youtube.com/watch?v=wOFbY5yVMrU woodstock 99
http://www.youtube.com/watch?v=9XFzwwckEM4&feature=related unplugged
http://www.youtube.com/watch?v=wOFbY5yVMrU Joey Jodison
有人問, 我鮑氏同上月出爐的金象影后鮑起靜有無親戚關係? 答案係無, 即使是有關, 都只係800年前同宗, 皆因我系鮑氏祖籍珠海山場(當時稱為香山), 而鮑起靜的父親鮑方則是祖籍安徽歙縣。當然, 曾奪得奧斯卡最佳攝影師獎的鮑起靜弟弟鮑德熹, 也是安徽系。 對於未能叨光, 我感到十分可惜。
http://www.lizawang.com/talk/talk25_bau_fong/life.shtml 鮑方生平
p.s. 日前我租了「天水圍的日與夜」影碟, well, 其實我唔太懂欣賞。我只想說, 天水圍好像沒有那麼濃厚的小資產階級氣氛; 而且, 片中瘋狂褒獎傳統貞烈女子, 好像有點不合時宜。
恭喜顏黃聯婚, 祝百年好合, 永結同心!!! 上週五出席中學同學的婚宴, 暢飲紅酒!! 地點在megabox十四樓百樂門, 又見返中學同學, 十分高興。 最特別是相認一個小學同班同學, 世界真細小!! 一別20年, 大家都做了老豆, 哈哈!!
百樂門有架車載新人入場
今週末口福不淺, 因為係母親節。 週六晚去沙田龍華酒家食晚飯, 同外母慶祝母親節, 吃、乳鴿、豆腐花、隊啤, 勁正!!! 亮欣都有食乳鴿脾, hoho!
四隻切開, 正正正
週日晚入屯門我家姐屋企慶祝我母親的母親節, 又狂吃串燒、牛腩、大蝦、粟子蛋糕、飲紅酒, 好味道呀~~~! 祝外母、母親及我老婆天天開心。
-----------------
週日教會講題: 基督徒不應只在週日返教會時才表現很好, 而是要在週一至六都要讓聖靈帶領、活出信仰, 在工作場所、婚姻生活及家庭之中做到最好。
上週五勞動節假期, 陽光普照, 一家又去戶外, 今次去了赤柱。
很明顯, 今次的選擇係錯誤的, 假期去赤柱實在太多車多人!!! 下午2時半由調景嶺出發, 竟然用上2小時才到達, 比去深圳還要遠! 由於當日有五一遊行, 銅鑼灣小巴站要移位, 長籠足足等了35分鐘才能上車, 車路擠塞又令小巴車程增至40分鐘, 靠一包童星點心麵延續鬥志。
4時半由赤柱廣場行至沙灘, 很熱鬧, 邊吃donut邊拍照, 絕對係體能測試。 亮欣看wow wow、小朋友追逐、大哥哥踢走球等都很高興。 6時回程, 赤柱路段又塞車, 幸好在總站上車有位, 其他站的遊人呆等長籠更慘。今次行程雖然辛苦, 翌日大虛脫, 但總算開心難忘。
吓!?
食蟻獸Smally衫, 時款料靚, 我家姐的店鋪有售。地址: Starry Kids 屯門市廣場一期2樓2197(冒險樂園對面)
-------------------
週日教會講題: 為何有些基督徒滿有衝勁, 有些又愁雲慘霧? 分別在於他們心裏有沒有聖靈。 如何讓聖靈進入內心, 必先要順服和相信上帝。不少人時常給自己藉口, 不願順服上帝; 有些又中了魔鬼的詭計, 不去主動認識聖靈, 更以「hea」的態度過活, 例如染上網癮, 浪費人生。
今日報紙話豬流感, 即係豬瘟, 殺到黎亞太區。 唔係輕敵, 但我覺得呢鋪唔會有sars咁大鑊, 因為香港人經過sars一疫後, 公共衛生都進步了不少, 加上近年各地政府監察禽流感已有很好多的制度, 今次發豬瘟應該可以大步欖過。 希望美國果邊也可以盡快遏止疫情。
有人話, 豬瘟爆發2、3個月後樓市會跌到底(例如sars時陶大花園跌到60萬元), 屆時海嘯生還者可以入樓市, 搏03年大反彈重演。 不過, 我諗, 呢支歌仔無唱得咁易, 因為當人人識得咁諗時, 樓市係唔會跌俾你買, 而且數據顯示, 樓價在3、4月已大升一成多, 返回去年9月雷曼倒閉前的水平, 再大升的機會不會很大。 最重要一點係, 海嘯生還者其實係百中無一, 即係無蝕股、無被裁、無減薪, 兼有得加薪抗通脹的人, 只係好小撮人, 根本好難托高樓市。總之, 6月前換樓或置業都是好時機, 炒就無乜水位喇。
反而大家應該關心下, 豬瘟對歐美經濟的影響, 可能令香港經濟延遲復甦。全球經濟雖則話回穩, 但實在很脆弱, 最近又話多間美國銀行過不到壓力測試, 不明朗也。
另外, 豬瘟引發大家買口罩, 因為報紙話, 驚五一黃金週大陸遊客會傳o的病毒過黎。 此言差矣, 擺明係歧視內地人。雖然03年果時話sars係由一個內地教授傳來香港, 但今鋪擺明係跨國病毒, 最大機會失守將會係赤臘角機場, 無理由賴內地人。 大家留意下邊個朋友o係歐美返黎, 隔離佢十日好過。
目前豬瘟未抵港, 各商場、大廈和公共場所已加強了清潔工作, 開創了不少清潔工作職位, 紓緩失業率升勢。6年前sars時好流行貼出「此電梯每兩小時清潔一次」, 但一年後, 告示仍在卻係每兩週清潔一次, 宜家終於重新加強清潔, 公眾當然歡迎。
sars一疫, 是引發03年七一大遊行的眾多原因之一, 高官下台換特首。今次豬瘟會否衝擊官場? 可能性很低。 唯望今次香港可以靠自己抗疫, 唔洗等阿靠送口罩、板藍根咁無面; 仲要係, 邊度社區爆發都好, 千祈、千祈、千祈, 唔好俾溫總探訪過的陶大花園再爆, 否則「有辱國體」, 烏紗難保。 至於2012年想選特首的黑馬白馬, 今次係好機會自薦做掃街大隊長, 好好把握; 邊個想做世衛總幹事, 記住、記住、記住, 日日食豬。
----------------
上週教會講題: (徒 13:1-3) 教會應該積極支持宣教工作, 正如聖經說安提阿教會差派巴拿巴和掃羅去宣教。 講者指, 他教會由十多二十個青年一起成立, 每年經費約廿多萬元, 但大家仍不辭勞苦, 每年額外籌集12萬元派員到海外宣教; 更重要是營造了宣教氣氛, 現時教會內老中青也致力傳道工作。
周二再次北上尋碟, 今次找到babyfirst系列, 25元一隻dvd; Dora英語卡通, 45元三隻dvd; 幼兒學跳舞vcd, 20元。 另外, 買了很多中英對照故事書, 13.9元一本, 印刷精美, 抵!!! 仲有托兒所曾經用的小波立體書系列。 另外, 買了一本貼紙書, 都不俗。
發現很多Thomas&Friends火車的vcd, 但只有普通話配音, 所以無買。 15元一隻, 其實都好抵。
結他書, 當然不少得。hehe
地點都是深圳少年宮書城, 又吃味千拉麵, 叫了咖喱炒飯。 來餐好像太慢, 要25分鐘, 很肚餓! 落馬州線港鐵等開車要15分鐘, 班次不算密, 回家到調景嶺始終也要用1小時45分。
上一篇: 北上尋碟3 http://jwkpao.mysinablog.com/index.php?op=ViewArticle&articleId=1536083
---------
上週日教會講題: 彼得夢見天降各種動物, 上帝叫他吃掉它們, 但彼得因為守習俗而無跟著做。原來上帝的意思是叫彼得打破舊規條, 向外邦人傳福音。基督徒也應走出自己習慣的舒適區, 去別處傳福音。
